Facebook Phit In A Dang social media Kan Tuah Ding Tin Ralkap Council In Sim

Facebook Phit In A Dang social media Kan Tuah Ding Tin Ralkap Council In Sim

Myanmar ramsung ih kan hman larbik social media a si mi Facebook hi phit tahratin social Media pakhat a aiawh ah kan tuah ding ti’n ralkap council thusimtu Bogyoke Zaw Me Lung (Zaw Min Htun) cun tui’ ni August (17) ni thuthang simfiangnak ah a sim.

Facebook hin miphun thuthawn pehpar mi account pawl, post pawl a delete (a hlon) sak tiah Bogyoke Zaw Me Lung cun a ti ih Facebook ai ah social Media a dang pakhat tuah dingin timlamnak an neih thu a sim.

”Phun hnih in tuah a si. Phun khat cu rikham cia mi lan in an um. VPN hmang tahratin an lan. Asinan, an lan suak ringring thei lonak dingah ttuanvo neitu department lam pawl thawn hma kan la ding. Hlawhtlin cu a theih hrih lo. Himi ai ah Social Media Platform pakhat kan ruahman rero a si”.

Himi social Media cu mithiam pawl, ramsung Vuankyi zung pathum kom in kan tuah ding tiah a sim bet.

Ralkap council hin social Media a tuah tum mi hi sullam nei lo ding mi a si bang in an tuahsuak thei ngaingai khal sehla mipi pawl lam in kan hmang duh cuang lo ding tiah hmin lang lo pakhat cun a ruahdan a sim ve.

”A sullam um lo tuk mi a si. Facebook an phit thei ding le ding lo cu thuhran. A dang platform a tamtuk. An tuahsuak thei khal sehla kan hman ve a ttulnak a um lo. Facebook company in ralkap luban pawl ih Personal Account pawl, thuthannak an Page pawl, a dang ralkap thuhla policy hailangnak media pawl a phit sak thluh ruangah hitin a simnak a si a zumum. An thiamnak in an tuahsuak thei ngaingai a zumum fawn lo”.

FILE PHOTO: A 3D-printed Facebook logo is seen placed on a keyboard in this illustration taken March 25, 2020. REUTERS/Dado Ruvic/Illustration

Ralkap council dinhmun in a tu ahkhal Facebook an phit rero ko nan an hlawhtlin lo a si thu khal Bogyoke Zaw Me Lung cun amahlemah a cohlanawk thu a sim.

Cun, Russia ram ih meithal kah zuamawknak ih fehtu ralkap lubawk pawl ih thuthang post mi a zaten Facebook company in a hlon (delete) sak thluh mi thu thawn pehparaw in Facebook company a mawhthluk zet thu khal Bogyoke Zaw Me Lung cun a sim bet.

Ralkap council cun thuneihnak an lak hnuah Internet le phone line phihsaknak, caan bikhiah saknak ti pawl tlun ah Facebook tel in social Media hrekkhat hi ramsung ihsi hmang thei lo ding in an tuah a si.

Internet hman tikah khamtu um lo ding in nawrsaktu VPN(Virtual Private Network) hmangtu pawl thawng kum (3) tla thei ding ih Cyber Security Upadi chater an tuah ih hlei ah ph sung ah VPN Application a um le um lo khal tui kum January thla ihsin an check thok zo a si.

Myanmar rampi dinhmun in Facebook hmangtu mipum hi 19.25 Million an si tiah Data Reportal Website in February (15) ih thu a suah mi ah tarlang a si.

// RFA

1 Comment

Comments are closed.