eBook zuar man in CNDF ah bike 2 le Kanpetlet ah ting 4 hlu

eBook zuar man in CNDF ah bike 2 le Kanpetlet ah ting 4 hlu

Van Kio ih lehmi ‘Zalennak ruahsan in” eBook zuar man in CNDF ah 125 bike pahnih le CDF-Kanpetlet ah ting 4 a hlu tiah theih a si.

Bike pahnih hi sumpai cun ting 20 man hrawng a si ih CNDF ralkap pawl kut ah a thleng fel zo.

Van Kio in “CNDF ah thilri zawng in pe sehla ziangmi si an tul tin anmah thawn naivaimi ka suh tikah bike hi in khih hmuh hai. Pakhat lawng a lei thei ding hmang ka ti lai ah cabu leitu pawl an rak tang tuk zar ah bike pahnih kan pek theinak a si. An hrang khal ah a tangkai zet ding ka zum” tiah a sim.

Cun Van Kio in “cabu zuar man in hi zatzat ka pe sal thei ding ti hman ka ruat ban lo. Hmansehla cabu rak leitu pawl hi an tang nasa. Cabu man zat cekci ih in leitu hi an mal te. Bu khat ah 3000 ka ngen nan thawng 10, thawng 50, ting 1 tivek ih in leitu an tam nasa. Cabu in rak leitu nan zate parah ka lungawi tuk. Tu tla eBook si nawn lo in Audio Book rori in mipi ralkap le mipi harsa pawl bomnak hrangah kan run suah peh vivo ding. Cu tik khal ah tha in rak pe vivo uhla. Cun ram tin ih palai ka retmi hreh lo te’n an bank account ah paisa in rak thunter ih an par khal ah ka lungawi nasa” tiah a sim.

eBook zuar man hi malte a tang lai ih Malaysia lam in in kuat theh asile cumi thawn kom in hmun pakhat khat kan hlu bet lai ding tiah a sim.

eBook zuar man in June thla ah PDF-Kalay B-4 ah ting khat, PDF-Kalay B-5 ah ting hnih le July thla ah CDF-Mindat ah ting hnih le hrek an rak hlu zo.