Theih palhawk ruangah mipi ralkap an kap ih mi pahnih hriam tuar

Theih palhawk ruangah mipi ralkap an kap ih mi pahnih hriam tuar

Tedim peng, Haimual khua kiang ah PDF-Zoland ralkap pawl cu LDF/VDF pawl in rallokap pawl ah an neih ih an kap ruangah mi 2 hriamhma an ngah tiah thuthang kan ngah.

Thu umdan cu PDF-Zoland hotu pakhat ih pa cu India ram ah a thi ih a pai’ ruak hung hmuak ding in bike 5 thawn an hung so ih August ni 4 zaan nazi 7 le 8 karlak ah ramri an thleng. Zaan a si tikah bike mit le an vang ngam lo. An hmai ah gate pakhat an va tong ih rallokap gate ah an ruat, kir sal ding ah le a tlai zo tikah an pah lawlaw. LDF pawl khal in bike to pawl in meithal an keng ti an hei hmuh tikah rallokap hmang ah an ruat ve ih an rak kap.

PDF-Zoland an kap ngahmi pa in “New Haimual ih um Eagle Mountain pawl kha lamzin a felfai maw ti’n ka sut aw fel, na duh tiktik ah hung so aw ti’n in ti tikah kannih khal hnangam emem in hmanhmawh thawn zaan ah kan hung thleng. Rin lo pin kan hmai ah gate pakhat kan hmu hruak cu uico pawl ah kan neih. Kir sal ding ah le a tlai zo. An gate hmai in bike cak pin ka mawng ih meithal puak awn vei hnih cu ka thei. Ka dung ih to pa in ka ke in ngah a na tuk kan cawl pei in ti nan ka thih khal ah ka ruat cu uico pawl in an ngah ding si lo rengreng. Ka pi tei’ khua tal cu kan so tento ko ding ti’n New Haimual tiang kan hung so. Cutawk ah Eagle Mountain pawl in in rak tuamhlawm ih kei cu ka luci a mit ih Champhai sizung ka thlen hnu lawngah ka lung a hung fim” tiah a sim.

Cun a simbetmi cu “Pathian remruatmi pakhat cu kan dung ih ka ralkap pawl in auto meithal an keng ve nan an rak kap lomi si. Lo sehla thi le hriam kan um phah nasa ding. Kei hi cerek in ka khuk, ka tai, ka ban le ka awm ah in ngah ih cerek mu 13 an phawrh suak. Ka milai pa cu kei ai a zia um” tiah a sim.

An pahnih in tu hi Aizawl sizung ah an um ih zarh khat sungah sizung ihsin an suak ding tiah theih a si.