Rih rallokap camp kiang ah bomb pal ngah ruangah puvah 2 te hriam an tuar

Rih rallokap camp kiang ah bomb pal ngah ruangah puvah 2 te hriam an tuar

Falam peng, Khawthlir khua ihsin Rih ih bazar ra kai puvah 2 te cu an kir lam ah rallokap camp kiangah zun thawh ding in zinkap a va fehnak ah a pu in bomb a pal ngah ih an puvah in an ke ah hriam an tuar tiah thuthang kan ngah.

Thuhla umdan cu tui’ ni August ni 6 zingah Khawthlir ihsin kum 39 mipa le a tunu kum 2 mi te cu Rih ah bazar an va kai. Zing nazi 9 le 10 karlak ah khua ah an kir sal.

Rih rallokap camp hmai zin in an feh ih a pu zun suak ah camp kiangah a bike cu a dinpi ih zinkap ah zun thawh ding in a va feh. A tunu te cu bike kiangah a rak um.

Vansiat ah zinkap ih bomb an kammi a va pal ngah pang ih an puvah cun bomb them pawl in a tekngah ih ke tan ding khawp cun an bese lo.

Sinan bomb ih a perh ngahnak ah a pu sawn hi a taksa ah pem tete a ngah tam tiah theih a si.

Bomb puak awn ruangah rallokap pawl in an camp in meithal thawn an run kap ciamco nan an ngah lo. Mina pawl cu tu ah Champhai sizung ah an thleng zo tiah theih a si.

Curuangah mipi veivak kan theih tulmi cu mipi ralkap camp siseh, rallokap camp kiangah siseh cawlh um lemlo a tha. Cun zin kan zawh a sile zin lai mi zawh theunak lawng kan zawh pei. Cun lamzin ah zun le ek kan tlan duh tla le zin kap tuk ah feh lo ding. Zun tla cu zin par rori ih thawh a poi lo.

Myanmar ramsung hmuahhmuah hi ralram a si theh ih vansiat kan ton pang a sile zo hman mawhthluk thei a si lo ih mah le theihnak thawn fimkhur ringring kan tul.

1 Comment


  1. a va poi thei ve aww. Pathian in an puvah in dam cah nak pe lohli hramseh.

Comments are closed.