Kalay peng Thayakung khua kiang doawknak ah PDF-Kalay pakhat a thi

Kalay peng Thayakung khua kiang doawknak ah PDF-Kalay pakhat a thi

Kalay peng Thayakung khua kiangah August ni 3 sun ah rallokap le mipi ralkap pawl an doawknak ah PDF-Kalay B6 ih ralkap Wai Min Thaw (kum 19) cun ram hrangah a nunnak a hlan tiah theih a si.

August ni 3 sun doawknak ah mipi ralkap lam mi 3 hriamhma an ngah, sinan nunnak hrang thlaphang ding cu an um lo.

PDF-Kalay B 6 ih hotu pakhat in “tu a thimi kan ralkap hi unau hnih lawng an si ih an unau in kan ralkap veve an si. A u hi si-vai lam ah a tuan ih a nau hi meithal a kai. Kum 19 fang mino te a si ih tlawngkai rero ding fang a si. Rallokap laltawhrawt a do ti ai in thudik lam tang in ral a do ih cumi hrangah a nunnak a hlan” tiah a sim.

GTU tlawnginn kiang ah August ni 2 sun in an do aw thok ih rallokap pawl in Thayakung khua mi 10 an kai ih cumi sungah mipa pakhat cu an that. Curuangah Thayakung le a kiangkap khua pawl cu sahimnak ah an tlan theh.

Tui’ sun August ni 4 sun khal ah Thayakung khua kiangah an do aw ih rallokap pawl ih hriamhrei tum kahmi ruangah Thayakung khua inn 2 a kang zo.

Kalay in rallokap motor 2 thawn GTU lam ah mipi ralkap va do ding in an va phei ih tlun van khal ah vanzam an zam kual rero tiah theih a si.

Ni 3 sung an doawk ruangah mipi ralkap lam cerek an tlasam ih mah le ti thei tawk in sumpai thawn tanpi an tul.

Leave a Reply

Your email address will not be published.