NUG in Khawsung Tlawngkai maw, kailoding thu ah Thu Felfai rel cat

NUG in Khawsung Tlawngkai maw, kailoding thu ah Thu Felfai rel cat

2022-2023 fimzirkum Tlawngon tikcu ih Tlawnginn siatsuahtu cu zovek pawlkom an si khalle cohlan a si lo dingih NUG in nasazetin a dodal ding tiah NUG cozah pumruang a si mi Ministry Of Human Rights zung ihsin June 3 ah thu an suah.

Hitiih thusuah thar an tuah nak san cu mipi ralkap pawl Tlawnginn siatsuahlo dingin ralrin an pe phah khal a si ih, May 31 ih Yangon khawlaili bomb puak mi thawn khal a pehpar aw.

Khawsung bomb puahnak cu SAC ralhraang cangvaihnak a si ti`n NUG cozah in a pom ih, cuvek thothoin Tlawnginn pawl ah mipi ralkap ti hminsia duhin bomb puah an phang ruangah siseh, mawh neilo mipi thihhloh an phang ruangah ralhraang ralkap pawl ralrin an pe cih mi a si ih “Tlawngta pawl humhimnak hrang cu SAC khalin ṭuanvo a nei ve” ti`n thusuahmi ah an ngan tel.

Kandungbai, May 31 khalah Shan ramkulh Nawnghkio peng fimzirzung ah bomb a puak ih Sayama pakhat thi in hriam pu 8 an um. Cukhalcu ralhraang ralkap cun PDF cangvaihnak a si ti`n an puh.

Khawsung mipi ralkap pawl khalin kan nih kan si lo ti`n thu an suah ve ih “ziangtik hman ah mipi umnak hmun bat hrim in cangvaihnak kan tuah dah lo” ti`n thusuahmi ah an ngan tel.

Cuvek buainak um bet lo dingin le mipi zawn ruat in NUG cozah in Tlawnginn siatsuah a kham mi a si ih ziangvek dinhmun kan si ding timi cu a tikcu a kim lawngah a fiang ding.

Chin ramkulh ah Tlawngkai hmin cazin pe 22,000 ṭha an um ih rampumhuap ah Tlawngap malbik kan si.

 

Tlawngkai mipum um zat thu thawn pehparin Ralhraang ralkap cun hmin pettu mipum 5 million luan um zo vekin thu an suah nan NUG cozah cun Tlawngkai tuding mi malte lawng an si hlei ah Saya/ma le Tlawngta CDM tuahtu tamsawn cu tudinhmun khalah CDM an tuah lai ko ti`n thusuahmi ah an telh.

Cuhleiah atu ralhraang Tlawng on mi cu “Fimzirnak” hmanrua ah hmangin an hrang hlawknak liolio ah an ong hrim mi a si ti`n NUG cozah in a pom.

NUG in lailak tikcucaan ih nauhak pawl fimzir theinak dingah hmalak rero laimi khal a nei ih, online ihsin fimzirnak hrang hmalak zomi khal a nei.

Tawlrelmi Internet le Online ihsin fimzir thei cin cu cumi ah zir peh vivo hrih dingin le, ralhraang Tlawngon mi hnong hrih dingin forhfialnak an nei a si.

Atawi zawngin kan sim cun NUG le Mipi ralkap tawlrelmi Tlawng pawl ah kai cio an duh sak ih, cuvek ih kai remcang thiamlo pawl khal mah le remcannak ah kai hrih hai seh ti thawn a bangaw. Curuangah zo pawlkom khalin Tlawnginn siatsuah lo dingin thu an suah mi a si.(Opinion)