KNDF ralkap in Ralhraang ta meithal an lak sak mi hi ziangvek a si, ziangtin an hmang ….

KNDF ralkap in Ralhraang ta meithal an lak sak mi hi ziangvek a si, ziangtin an hmang ….

KNDF in raldo nakih ralhraang ralkap ta meithal an lak sak mi zuk cu online ah thlah darh a si ih atufang internet cahmai ah mipi rel a hlawh zet.

Ziangvekin hna a ṭuan, ziangtin an hmang ti thei ciang loin drone vanzam fate kah parh thluh nak a si tivekin silo deuh ih ngan mi hmuh ding a um.

Atakcun hih meithal cu cerek tivek thun a ṭul ve lo. Battery thawn ti nung ṭul a si ih Drone vazam fate kahnak liolio ah tuah mi a si.

An kah tikah minung mit ih hmuh theih lo mi dat (electromagnetic noise) a suak ih Drone vanzam le a control tu pehzomawknak signal kham sakin Drone vanzam ti tlatu meithal a si.

A ṭha le sia zirin hmun hla kah theih cin a bangaw lo ih IT thiam ṭhenkhat cun meithal vek, kut ih ken cii ah pengkhat hlat tiang kah theih mi a um tiah an sim.

 

KNDF in ralhraang ta an lak sak mi Anti-Drone Signal Jammer meithal hi China (Shenzhen Texin Electronics Co.,Ltd.) ram suak a si ih a tuahtu company tarlang dan ah pakhat ah US $ 2000 man hrawng a si. Meter 2000 tiang hrawng a ban thei.

 

A suahtu Company cun duhduh in lei a theih an ti nan, duhnak hmun ta piang ah hman a theih lo. Cozah rori ih kham nak hmun khal a um.

2018 ah Hong Kong khawsung ah dorne vanzam thawn picang zetin light show an tuah lai ah mihuatsuak pawl in signal Jammer thawn an kap sak ih Drones 46 rori a tlak siat. HK $ 1 million lenglo an sung ih a neitu company in cozah hnen ah a heek ih HongKong hmun ṭhenkhat ah cuvek meithal hman an khap phah.

Zovek pawl in an hmang?

Huatsuak ih hmangtu an um rualin ram ṭhenkhat ah cozah rori`n an hmang ṭangkai tuk. Misual pawl in Thawnginn sung riit theih siivai thlaktu ah Drone vanzam fate an hmang ih cuvek kahnak ah Thawnginn kil palik pawl in an hmang ṭheu.

Ralram khalah an hmang nasa ih, tuṭum Ukraine ramsung buainak khalah Russia khalin siseh Ukraine ralkap pawl khalin an hmang ṭangkai zet a si.