Vanzam Thawn Ralhrang Pawl Hrang Ei-in Thlakmi KNLA In Sar Ngah Thluh

Vanzam Thawn Ralhrang Pawl Hrang Ei-in Thlakmi KNLA In Sar Ngah Thluh

KNU t’at-maha (5) hmunram sung ih Meewai khuakulh sungah hram bunmi ralhrang sakhaan hrangah tuni April 25 zaanlam ah ralhrang in vanzam thawn ei-in a va thlak hai nain a thlakmi thilri zate deuh thaw cu Karen ralkap KNLA in a co ngah thluh tiah thuthang theih a si.

 

Tuni zaanlam nahzi 4:30 pm ah ralhrang in ei-in tom (5) vanzam thawn vawi khat a thlak ih nahzi 4:45 pm ah a vawi hnihnak ei-in tom (6) a thlak sal. Ralhrang in vanzam thawn a thlakmi ei-in tom pawl sung ihsin tom (9) cu KNLA ralkap pawl in an sar/laak ngah thluh zo ih a taangmi a dang tom hnih khal an hawl rero lai tiah theih a si.

 

Meewai ralhrang sakhaan ah Khah-lah-yah (97) t’at-yiin le Khah-mah-yah (405) t’at-yiin ralhrang pawl an um ih hriamnam le ei-in pawl phurhnak lamzin pawl cu Karen ralkap KNLA in a zaten an phit/kham sak thluh ruangah vanzam thawn tlun van ihsin atuvek in ralhrang in ei-in a va thlak hai hi a si.

 

Khah-lah-yah (97) t’at-yiin ralkap pawl hi dunglam ah an tlun/kir caan a kim tuk zo nain an tlung ngam lo ruangah Khah-mah-yah t’at-yiin ralkap pawl hnen ah a va kom/fon aw mi an si tiah thuthang theih a si.

Source: Khit Thit News.