Tiamkhau

Tiamkhau

Mal hamțhat țuan rel lo’n
Tam hamțhat hmarngai zuam awin
Hrinte mal din an tum kha
Lamzinpi kong a dal riangri men….

Rualhrin za-țek sekkhawm tum khal
Laiking puanpi tah tum a hluan țheu
A mawi ee, a sersi ee kan ti, nan ti
A tuhrah seng khan kan fiang mai lo maw?

Hlan ih zin hlo dah pa khal
A unau lakah cun Lal si a tum ngam lai
Lairam sunhlu thawt zia tep cing in
A unau zuartu kha amah a sisi…..

Tiamkhau sihaw tahratin
A nui anka a leh dan hrimhrim khal
Phiartu si leh ding a khihhmuh cia
Kian uh, tlansan uhla, kan him ding….

Kannih zaihla cu hitin si sawn seh!
”Hrincawi hnianghno rual tla’n
An pui’ luphumnak hum in
Deh hmang hring ei ral lian lakah
Mansung nunnak hlan an zuam……”

”Zalonnak thantar le
Rinumnak rolung khal
Tiam nikhiah a kim ni ahcun
Fak hluan tawp ti nei loin
Tesinfa san deng khuh tiang
Ngil zenzi in kan siahphun leh ding…..”