Will Smith in Chris Rock ih hmai a beng thu

Will Smith in Chris Rock ih hmai a beng thu

By Siang Thlai Rem (Siang Te)

Tui’ kum Oscar puai ah cankaitu Chirs in minta hminthang Will Smith ih nupi a capo. Will Smith ih nupi Jada Pinkett hi autoimmune natnak, Alopecia kan timi a neih ruangah a sam a tlawk theh ih, a Lukawng. Chris in, G.I Jane movie part 2 an tuah sal ahcun, Jada Pinkett nih lem a cang ding ka zum a ti. G.I Jane hi 1997 kum ih lar zetmi Navy Seal ih nunau raldo thiam thuanthu zuknung a si. Himi zuknung ah lemcangtu hi mintami hminthang Demi Moore asi ih a Lukawng.

Cutin a capo cu mipi an hni vualvo. Will Smith khal a hni ve. Sinan, akiang ih to an nu Jada Pinkett ih mithmai sia a hmuh vete’n stage parah a va kai ih Chris ih biang a va beng. A tonak ah a ra kir sal ih, “.Na ka phit aw, kan nu kha vek in capo nawn hlah” tin a hei auh bet.

Oscar hi, lemcangthiam pawl kum tin laksawng an pek mi, Leitlun ih hminthang puai pakhat a si ih mipi millions tel in TV ihsin an rak zoh. Will Smith in Chris a biang a beng thu ah hmuhdan leh ruahdan phunphun tampi an ngan nan siar cio ding ka zum.

Will Smith ih fans pawl cun, Chirs ih mawh liolio, ziangah mi damlonak cu capo a tuah?  Will Smith hi a ral tha, a nupi par ih a duhdawtnak mipi hmaiah a lang ter ngam an ti. Mi hrekkhat in le Smith hi professional icon pakhat a si nan a sup aw thei lo, a puar thau, Oscar awards ngah tlak a si lo, a thinheng tla len mipi hmai ah Chris hi mualphoh a tul lo, rualpi tha an si ih amah a sim thei ko nan si an ti. Mihrek khat in le Will Smith ih nupi Jada Pinkett hi capo men ah ziangah a mithmai a sia, mi tlaitluang lo leh mahlehmah zumhawknak nei mal an ti.

Chirs hi capo relthiam hminthang pakhat a si nan, a capo tuah a luan thei tuk tin mawhphurhtu khal an tam ve thotho. Cun mipi hip duhah tumtahnak nei ih beng aw an si titu tla an um. A tu cu, an pahnih in mipi hmai ah social media in ngaithiam an dil aw veve zo. Ziang a va si khal le, zo a mawh leh mawh lo ka sim duhnak a si lo. Sinan, ka thinlung in la tukmi thil pakhat ka rel duh.

Will Smith in himi Oscar puai ah laksawng a ngah ih stage par ah lungawi thu a sim. “Cawlhcan (break time) minute malte kan neih lai ah, ka rual Denzel Washington in a leng ah in hruai ih kuah phah in, “Will Smith, na hlawhtling ih dinhmunsang na thleng tik ah thlemnak hi ralring thiam aw” inti timi hi a si.

Hminthang hi a har zet nan, reipi hminthang ding ih kilkhawi thiam hi a har sinsin. Will Smith hi professional icon si ding in caan saupi nasa zet in a rak zuammi hi, sup aw thei lo in, Oscar ih a thil tuahmi nih a career tampi a hngong ding ka zum. Cun, a mah uartu mino pawl nih a thu cawng in midang parah kutthlak hluahhlo tivek tla a um thei. Asi…minung hi kan hlawhtling ih dinhmun tha kan neih tikah, kan thinlung a puarthau ih thlemnak phunphun pahsuak thei a har ruangah mi tampi rei awh lo in an tlasia sal theu

Cun….

Thudik hmuahhmuah tla hi sim a tul lo. Ahleice in midang ih tlaksamnak leh tlinlonak hi a dik a si hmanah kan rel a tul thluh lo. Tahthimnak ah mi pakhat a thau tik ah, “na va thau ve, tawl deuh aw zoh na sia tuk” tivek …

Will Smith tei’ sungkua

Nunau thenkhat samtawi tla, “nunau cu samsau hi zoh nan mawi bik” tivek in capo sual hlah. Ziangvek dinhmun a tong ih a tuar ti kan thei lo,  a duhhril silo in Cancer leh Chemo tuamhlawmnak ruangah a sam a thlong theh tla a rak si thei, ralring thiam a tha. Will Smith tei nupa leh Chris hi rualpi tha capo aw theu an si. Laimi khal capo duh zet kan si. Ziangtluk rualpi tha sihman ah milak ih mualpho aw leh nelawk luantuk ih midang zahumnak tiang siatsuah in capo ih rahsuah hi kanhmuh vek a si ko ih hrial hrimhrim ding.

Rel ding tampi kathei lai nan…. Kahmuh dan asi ih hmuhdan bang aw lo ka cohlang.