In Liamsantu CNDF ralkap in a fanu te hrang a duhthusam

In Liamsantu CNDF ralkap in a fanu te hrang a duhthusam

Ngantu: Olivia Thawng Luai 

2022 kum March ni (14) ni ah Kawl ralhrang pawl nih an kai ih tui’ sun March ni 18 ah a ruak kan sar a si tin thusia kan dong lala.

Kan nih cun President @Japan Sobul tin a nickname a phunphun in kan ko. A hmin ngai cu Pa Ngun Hrin Hmung a si. Kan ralkap pawl rawlsuangsak tu (messing) ah kan rinsan zet mi lak i pakhat a si.

Sun a man caan ah fangdip ih thitcop mi bag tumpi a pai i….
President, ziang na tuah ding? kan ti le
Nau le hrang ah RPG mu ka hawl sak ta ding. tin in let theu. A sim mi RPG mu cu tampaw a si.

Kan ralkap pawl rawlei kaa thaw deuh pang ah tin zaal tumpi pai in a mah te hramlak le tivakap ah thinghnah zikno tete, kawhtebel, ngate le tampaw hawl sak in rawl hmeh phunphun a tuah sak hai theu.

-Kan ralkap pawl a fa le vek in a seherh thu,
-2021 ah a innsangnu in rinlo pi in a thihsan ih fanu kum 9 te cu a pi hnen khua lam ah seherh zet in a taan ta thu,
-Dothlengnak kan neh tik le a fanu te kiang ah um in cathiam, karate thiam a si ter duh thu
-Ziang tik lai caan khal i nunnak liam thei kan si ruang ah a fanu te a mah lawng leilungtlun ah ziang tin a rung nung ding ti a ruat har thu tla in ruah theu tu a si.

Tu ah cun, a fanu kum 9 te cu nu le pa nei nawn lo in a rung taang aw!!
Dothlengnak a va kha fualfo ve!!