Kum Thar Thu Tiam

Kum Thar Thu Tiam

Ka nun ih can hleice zet ttum khat ah, vantthat thlak zet in Robert timi putar dam rei thawn can kan hmang tlang dah. Kan um tlang lai ahcun Robert in thil tampi i zirh ih, tuvek can hin kan rak hnawihnihawknak pakhat cu i mangsuakter sal.

Robert cun, “Na dinsuah zo mi khulzam (momentum) a hlohlonak ding ah nangmahte’n hmuitinnak pawl na tuah a ttul ti a fiang deuhdeuh thlang,” tiah i sim.

Kei cun, “Kum Thar thutiam vek khi maw?” tiah ka sut.

Hni phah in, “Lunglutza ruahnak a si cu, kan tuah pei cu,” tiah i sawn.

Robert hi theihthiam har zet minung a si. Asinan cepoh hnih ih a hnih lai ah a mit an tleu zukzo ruangah thil pakhatkhat cu a ra thleng ding ti ka thei.

Robert cun, “Tuizan ih na ttuan ding mi cu cazin pahnih tuah ding a si. Cazin hmaisa cu TUAH KHAWSUAK NA DUH MI Kum Thar thutiam pawl an si pei. A pahnihnak cu NA TUAH KHAWSUAK TAKTAK DING MI Kum Thar thutiam pawl an si pei. Tuah khawsuak na duh mi cazin kha ngan hmaisa awla, na ruahnak a cem thluh tiang rori in ngan aw. Cu thluh ah cazin pahnihnak cu cahnah dang ah ngan aw,” i ti.

Cumi zan ih inn ka tlun tikah nazi tampi sung cazin pahnih cu ka tuah. Tuah khawsuak ka duh mi cazin tuah cu, a tir ahcun a har zik lawk. Asinan malte a rei cun, ka nun lamtluan ah phur rit pawl rak um lo hai sehla cun, tuah thei ka duh ringring mi thil pawl ka ngan thluh thei mai. Nazi pakhat a rei zik cun, ka cazin cu cahmai zate’n a khat thluh ih, ka sunmang nun (ideal life) si ding ah ka rak ruat mi ruahnak hmuahhmuah deuhthaw an tel thluh. Cazin pahnihnak cu a ol sawn. A cang thei ding mi taktak le a ttangkai ding ih ka ruat mi tumtahnak thutiam pahra cu zamrangte’n ka ngan thluh thei mai.

A thaisun ah Robert cu tualsung rawl dawr hmai ah ka tong. Cutawk cu kan titi a tlak tthat theinak hmun a si. Robert cun lungkim zet ih hni phah in,  “Na cazin pahnih thu cu i sim hnik e,” i ti.

“Cazin hmaisa ahcun, si ka duh ringring mi minung vek ah thlengawk vuarvi thei sehla ka tuah ttul ih ka ruat mi zate’n an tel thluh. Cazin pahnihnak ahcun tui ka nun hi cohlang in, ka nun hman vivo ka duh dan hrangah karbak taktak pal phah ih, ka tuah thei mi hmuahhmuah an tel.”

“Cazin pahnihnak kha ka rak zoh pei.”

Cazin pahnihnak cu ka pe. Anih cun a ca hman zoh lo in a kut thawn a hrual sutso ih, fatakte ah cangter in kan kiang ih hnawmbawm ah a hlon. Thungaithlak ih ka tuah mi thil, zah lo zet ih a hlon mi cun ka thin i tok lawk. Asinan ka thinheng a reh sal hnu cun cazin hmaisa kha thlir dan dang in ka thlir thei sal. Ka thinlung ahcun, cazin pahnihnak kha cu a hmin men ih ngan mi an si ih, cazin pakhatnak sawn hi a thupi taktak mi a si, tiah ka vun ruat.

Robert cun, “Tu cu, cazin hmaisa ka rak zoh pei,” i ti. A lu a kun ih a kut pahnih in i dil.

Cazin hmaisa cu ka pe ih, a siar ding hngak in, a mithmai cu second tampi sung ka zoh ringring. Daite’n reipi sung a um hnu ah, cahnah cu a kut thawn a hrual hlum ih, a sung hman zoh ta lo in, hnawmbawm ah a den lut lala.

Ka thinheng ka sup thei nawn lo ih, “Ziangah khatin na tuah?” ka ti.

Robert cun daite’n, theifiang aw zet awphawi thawn, “Na nun ih NA TUAH TTUL MI simaw, NA TUAH THEI MI simaw, kha an thupi nawn lo. Tuini ihsi cun na hrangih thupi mi cu NA TUAH TENGTENG TTUL MI lawng a si,” tiah i sim.

Cu thluh ah a zal sungih cahnah bil mi pakhat a phorh ih i pe.

Khimkhuahte’n cahnah cu ka pharh ih a laifang ah ttongfang pakhat lawng a rak um.

“Duhdawtnak.”