Ruahti malnak hmun ih thingfa kilkhawi dan

Ruahti malnak hmun ih thingfa kilkhawi dan

Ruahti malnak hmun ih thingfa cin tikah a buaithlakbikmi cu tidai tawih hi a si. Cunah tidai tawih tul lo, lole tidai tawih tul lemlo ding in a phunphun in zuam a si.

American ram ih nelrawn ramcar a simi Arizona ramkulh ah kum khat sung ruahpi sur zat hi zungpi bawk 10 lawng a si. Myanmar ram ih ruahti malnakbik Mongwa peng hman tui’ kum hi zungpi bawk 15 a sur. Hihi kum dang ai ruahpi a sur malbik kum a si. Zaran ahcun hi ai a let hnih in ruah a sur theu.

Arizona ramkulh ih khuapi pakhat ah hmuan neitu pakhat cun dandaluan le thingkung fate pawl a cing. Cui’ a thing pawl cu tidai ka tawih dah lo a ti. Fur caan ih zungpi bawk 10 lawng ruah an ngahmi in thingkung pawl a ti hring ringring thei.

Ziang tin a tuah ti a sile a hmuan sung zate’n thingci (လႊစာ) pawl sah emem in a burh theh. An ram Sipin pawl in mi hnaihnok theimi thing an hau tikah thing pawl khat cet in dip nerner in an tan ငh cumi cu a duhduh in a lak in an la thei.

Cumi thingci pawl cu pi khat tluk sah in an hmuan sungah a burh ciamco ih fur caan ih ruahti malte in kum khat sung tidai tawih tul lo in ti a rak khawl sak. Thingfa an phun tikah a hram ah thil pakhatkhat in an khuh/vur theu.

Cumi an thil vurmi pawl cun ruahti kha a rak zukih leilung sungih tidai pawl ti khu ah cang cih lo ding in a rak kilkhawi sak. Myanmar ram ih ruahpi tamnak Irawady ramthen ih um ka rualpa in thingfa hmuan a nei ve. Ruahti tamnak hmun a si nan ruah a sur lo caan ah tidai tawih a tul thotho.

Tui’ kum cu a thingkung pawl hnuai ah fanghi kha zungpi bawt 4 sah in a burh theh ih tidai a rak zawi bawm ruangah ahlan ih ni khat kaan ih tidai tawih tul theumi kha tu ahcun zarh khat vei khat lawng tidai a tawih.

Cunah ruahti malnak ih thingfa phun tikah a sehvel leilung ah cangpawl, fanghi, hramro, pekawm, lole pakhatkhat in na khuh a sile leilung ih ti kha a rak control ih tidai tawih rero a tul nawn lo.

A rei ahcun cumi na khuhnak pawl kha an rak rawp vivo ih dawm ah an cang. Cun ruahti malnak ah ruahti pawl a khawltheinak dingah thingfa na cinnak sehvel kha leilung lai kuar awla ruahti a khawl aw thei ding. Cumi parah thil pakhatkhat na khuh bet asile ni a hung sat tikah ruahti pawl a khu ah an cang cih lo ding ih thingkung hram kha a hnawng ringring thei ding.

5 Comments


  1. မှတ်တိုင်တစ်ခု ထူခဲ့ပါ


  2. ငြိမ်းချမ်းခြင်းတရားကို ကိုယ်တိုင်ယူပါ
    လာပို့မယ်လို့မျှော်လင့်မနေနဲ့


  3. ချင်းတောင်မှာနေချင်တယ် အမြန်အေးချမ်းပါစေ အောင်ပွဲရပါစေ


  4. Love Chinland.

    KokoRomeo


  5. အညာသားတစ်ယောက် ချင်းတောင်ရောက်ဖူးချင်တယ်

Comments are closed.