Tlolak par ih hnawmhne pawl tihnung zia

Tlolak par ih hnawmhne pawl tihnung zia

Kan dung kar July thlacem zarh ah Tuluk ram ih an thlahmi Long March 5b rocket cu Leilung par ah control tu nei lo in a rung tla ding ti’n social media ah an tar. Rel khal a hlawh nasa.

A taktak ahcun tlolak ih satellite them pawl leilung parah an rung tla sal ti cu thil danglam pi a si lo. Sinan Tuluk ram ih mawhphurhnak a lak lo ruangah khui tawk ah a tla pei ti theih lo thu ruangah mipi thinphannak a suahter.

Hivek ih tlolak ih hnawmhne pawl hi Space Junk tin an ko ih cumi tongfang in leilung ihsin an hun thlah ih an hman nawn lomi thil pawl, satellite hman nawn lomi a them tete pawl le cet thilri hman nawn lomi pawl khi a huap theh.

Tu laifang ah tlolak sungah satellite hman rero mi 4,500 lenglo an um ih hnawm tum tham deuh pawl hi thawng kul hrawng an um. Himi sungah hnawm fate te pawl an tel hrih lo.

A tlangpi ih zumdan ah tlolak ah 1 cm (Phiang fang tia) hnawm 128 million an um ih 1 cm-10 cm (Lingmaw rah tia) hnawm hi ting 9 luan a um. Cun 10 cm (4 inch) ai tum hnawm 39,000 lenglo an um tiah an zum. Cun tlolak sungih hnawm pawl hi anmah le anmah an pahawk tikah hnawm themte a tam sinsin.

Satellite tam sawn hi nazi pakhat ah peng 12,427 cak in leilungpi an hel rero. Hi tluk rang ih zammi thil an pahawk tikah a fate tak temi khal si hmansehla a siatsuah theimi cu a rak um ve.

Hmai kum rei lo te ah Leilungpi fehnak zin ih an thlah dingmi satellite hi a pung sinsin ding. SpaceX company hman in satellite fate pawl thawng nga lenglo a thlah lai ding ih a dang company pawl ih an thlah ve dingmi thawn kom sehla thawng hra leng a kai ding.

Hi tivek in tlolak ah hnawmhne a tam vivo a si ahcun hmailam ah tlolak ih vanzam zam hman a harsa sinsin lai ding. Culawng si loin Tuluk rocket sia leilung ih a rung tlak bang in neta ah minung umnak inn par vek ah an rung tla lo ding ti zo hman in rel theih a si lo.

Tlolak ih hnawmhne pawl huifai theh ding in ram hrekkhat in hlaikhlainak an tuah thok zo. UNO khal in satellite company pawl kha mai’ thlahmi satellite pawl hman theih nawn lomi cu kum 25 sungah thianfai sal ding in thua suah nan a taktak ih thlun hi a har lai a si hi.

1 Comment


  1. Pretty! This was an extremely wonderful post. Thank you for supplying this info.

Comments are closed.