Thihnak Mawh Pek Dan

Thihnak Mawh Pek Dan

Ngantu: Salai Thawng Pi

Thihnak mawhpeknak (death penalty) thawn pehpar in daan ah ziangti’n a um timi kan zoh pei. Thihnak mawh a pe theitu hi Pengkulh (district) thuţhentu pawl in a thok. Pengkulh thuţhentu (ခရိုင်တရားသူကြီး) in thihnak mawhnak a pek tikah Ramdinkhawm Thuţhen Zung (supreme court) ih lungkimnak laak a ţul.

Ramdinkhawm thuţhen zung in nemhngetnak a um hnu lawngah thihnak mawh an pekmi tuah thei a si. Thihnak mawh an pek ni ihsin ni 7 sungah mawhnak a neitu in Tlunlam zung ah (a-yu-khan) a kai thei. Thihnak mawh thawn pehpar in ralring zetin zung a dotdot in an zohfel hnu lawngah pek a si. Thihnak mawh pekmi pawl cu hri in a hnawng an ţeem ih a thih tiang thlaithat ding a si. [CCP S. 368(1)] Thihnak mawh an pekmi kha minu naupai lai a si ahcun Ramdinkhawm thuţhen zung in thihnak mawh an pekmi nemhnget ding an cawl hrih dingih a ţul tiih an hmuh a si ahcun thihnak mawh pe loin kum 20 thawngthlak dingin an thleng thei. (CCP S. 382) Thihnak mawh an pekmi thawn pehpar in President in mawhpeknak phundang (thihnak mawh pe loin) ah a thlengsak thei. (PC S. 54)

Hrekkhat in thihnak mawh an pe ih hri thawn an thlai tikah hridai a cat ih thi loin um pang sehla that loin a luat thei tivek in a ruat kan um. Thuţhentu in thah dingin thu a ţhencat ih an nemhnget tikah a thih tiang a hngawng in hri in thlaithat ding timi daan a umfel zo. A thih tiang thlaithat ding ti a si ruangah cuvek in hri a cah hman ah an thlai sal thotho ding.

Hivek in mawhnak a neitu thlaithat ding ni ah Thawng kiltu siannak thawn mawhnak neitu sungkhat unau kum 18 kim zo mi minung 12 tiang va zoh thei a si. An thah dingmi hi Kor raang a linglet in an hruh. A kep kha dunglam lam ah ret a si. Thlainak ding hmun par ih an ret tikah a ke pahnih an ţem ding. A mithmai an khuhsak ding. Hridai kha a hngawng ah hnget zetin an ţem ding. Thawng kiltu in na duhmi thla cam aw tiah a ti dingih hridai phelhtu in a phelhsak ding.

Mawhneitu a dinnak tangih sangka a ong aw dingih tanglam ah a thlai aw ding. Sangka tangah tidai a hrek hrawng a ummi a um ih cunah ah a tla ding. Hrekkhat cu hri an phelh ih an ruangpum a thlai aw mi kha a taal phah rero an um. Cuti ih hri an thlai hnu nazi hrek a rei cun Sibawi in zohfelnak a nei. Sibawi in a thi zo tiih a than hlan sung cu cutin a ruangpum thlai a si. Mithi ruang kha sungkhat unau in an dil ahcun pek a si. Diltu an um lo a si ahcun Thawnginn lam in ţuanvo an laak.

Galon U Saw in Bochuk Aung San thahnak khua a rak khang rungah thihnak mawh pek a rak si. President hnen tiangin zaangfah a rak dil nain hlawhtlinnak a ngah lo. Curuangah May 8, 1948 zinglam khawvang ah Innsein thawnginn ah hridai in thlaithat a rak si.

U SAW nupi in a pasal ruak laak a duh nain U SAW in “bawrhhlawh ruang” a si ruangah la hlah aw tiah a thih hlan ah a cah ta ruangah la sal loin an um. U Saw an rak thlaithat lai ih thah a tong ve mi Sein Kyi cun an thlaithat zikah “duat …… tu caan thok ihsin hi khawvel ah kei ka um nawn lo… hey…” tiah aw thuum zetin a au ta ti a si. Salai Khin Maung Oo kha June  1976 ah Ralkap uknak do ruangah hri in an rak thlaithat ve. Amah kha neta bik thah a rak tongtu a si. Cuih hnu lam ah tutiang Myanmar ah hri in thlaithatnak a um hrih lo.

Hramlaknak //U Khin Zaw