Bei Dong Hlah – Hugh Miller Herr

Bei Dong Hlah - Hugh Miller Herr

Hugh Miller Herr (1964 October 25 ih suak) hi lungto tlang kai thiam cungcuang a rak si. Kum riat a si lai ah Canadian Rockies lungto tlangtluan ih Temple Tlang cu pii 11,627 a pal ngah zo. Kum 17 a si ahcun Amerika Dingkhawm Ram ih lungto tlang kai thiam bik tiah ruat a si zo fawn.

Asinan a nun ah vanduainak a rung thleng.

1982 kum, January thla ah New Hampshire ramkulh, Washington Tlang parih Huntington Khuarkhawhrum sungah a rualpa Jeff Batzer thawn an lut. Hitawk hmun hi veivah harsa zet mi a si. Khuarkhawhrum ih an lut lai ah vur thli sia in a nuai hai ih, khuitawk zawn ah kan um ti khal an thei thei nawn lo. A netnak ahcun Great Gulf umnak lam ah an suk thla thei. Cutawk ahcun 29 °C degree a si mi khawsik cu zan thum sung an tuar.

Runsuaktu pawl ih an hawl hmuh can ahcun vur in a rak ciah bese tuk zo. Herr ih ke pahnih cu a khuk hnuai ihsin tan an ttul phah. A rualpa Jeff Batzer ih kehlam ke zim, vorhlam kezung pawl, le vorhlam kutzung pawl khal tan an ttul phah.

Sibawi pawl cun lungto tlang kai sal cu a cang thei lo lawlaw ah an ruat. Asinan Herr cun kai sal tengteng a tum hnget.

Massachusetts Institute of Technology (MIT) ah biomedical thilri thuhla lam in postdoctoral a tuah lai ah, amai’ hrangah ke lem a sersuak. Khimkhuah zet le ttha zet in a tuah ih, lungto par le vur lak ih feh remcang thei ding in, fem zet si ih ttang zet, a zimlam zum deuh in a tuah fawn. A taksa sanlam zoh rem ding, le a ttul can ah dok aw sang thei deuh ding khal in a tuah. Cumi ke lem a bun cun, pii 5 ihsin pii 8 tiang a san lam a thunun thei.

Cuvek ke lem thawn Herr cu lungto tlang pawl ah a kai sal ih, a tuahmawhawk hlan hnakih sang le hla a thleng thei. A thiamnak le taimaknak ruangah taksa kimcang neitu lakih lungto tlang kai thiam hleice pawl ih level a thleng thei. Kuttualleisam lak ahcun anih hi cuvek level thleng thei hmaisabik a si.

1 Comment


  1. Never Give Up!

Comments are closed.