Masada Shall Never Fall Again

Masada Shall Never Fall Again

Ngantu: Falam Kapte
Tipi thi (Dead Sea ) ihsin peng 3 tluk hla ih a ummi MASADA Kulh ropi tak thuanthu hi a thei lo kan umtuk zik lo. Asinan a tharten kan theihsal ding beiseinak thawn ka nganve a si.

Masada tlang hi Fit 1300-1450 sang, fit 2000 sau, fit 650 ih kau a si. A tlangzim thlennak dingah lamzin pakhat lawng a umih cui’ lamzin cu kelkhawi ngaingai a si ih, tlanghram ihsin a zim tiang hi a lamzin vekih tah ding sisehla peng 3 hnak ih sau a si ding. A lamzin cu a kelkhawi tuk ruangah (Rul Lamzin) tiah hmin an pek.

Hi Masada tlang hi lungto ti reprep umkhawm a sinan a fek zetih rinsanthlak ngaingai a si. BC 37-31 kum hrawngah Herod in a remṭha ih a relhnak dingah a rak tuah. Ral pawl in ol aiten an siatsuah thei lonak dingah a tlangzim rawn cu a kulhih a sanlam pi 18, a sahlam pi 12 in a tlàngzim cu a kulh. Ralvennak inn pi 75 sangin a sak. Cu hleiah a sungah pindan tampi tuahin le bualawknak (Swiming Poll ) khal a tuah fawn.

 

Herod a thih hnu ah hi kulh hi Rome ralkappawl an um lawk. Asinan 66 A.D ah Menahem Ben Yehuda hoin Judah pawlin an laksak. Cui ni thokin Rome uknak duhlotu hnam duhdawtu Judahpawl kut ah a um.

Thilmak zet a simi cu a tlangzim rawn hi leiṭha zet a siih, thlaihnah thairah cinnak khal ah an rak hmang. Cun lungto lak ihsin tidai lak ding a um phah ruangah Masada tlang ahcun todelhawk ṭhepṭhi ih umtheih a rak si.

Jesuh thih hnu kum 30 hrawng AD 66 ah caan rei tak rak uktu Rome cozah cu duh lonak langter in Simon Bar Giora in Zalennak( Independent ) thu a rak phuang. Cutin General Menahem Ben Yehuda leh Eliazar Ben Yair in Judah mi 28,00 rual cu kaihruai in ralṭha tak in Rome ralkap 35,000 hrawng cu nasa takin an do.

Cutin Rome cu Judah pawl in an neh deuhih Rome pawl ih ukmi Jerusalem khal Judah pawl kut sungah a um ve thei ta. Sinan Nero in General Titus le ralkap 15,000 cu Jerusalem do ding in a thlah ih, kum 4 sung a do hnu AD 70 ah Judah pawl cu Rome in a neh ih an suanvawr Temple khal an balsiat ṭheh ih a sung ih lungmankhung khal an laksak ta.

Culawng si loin Judah pawl in an pum sungih an dolhmi sui, lung mankhung khal a phorhsuak ṭheh.A va rapthlak emem. Cutin Jerusalem cu a tlu ta.

Matthai 24:2 ih Jesuh simmi a tak in a kim.
Jesuh in, “A si, hi pawl hi zoh hnik uh. Fiang tein ka lo sim: Hi lungto pakhat hman hi a umnak keel ah a um nawn lo ding; a zate in balthlak ṭheh an si ding,” tiah a ti.

Hiṭum ah Judah mi 1,000,000 hrawng an thi tiah Historian pawl cun an sim.Thi loih a tangsun khal Sâl ah an hruai thluh. Asinan hiṭum ah minung 960 lengcu an rak tlansuak man.

Herod hi Judah siangpahrang asinan Edom hrin a si ruangah le a sualral tuk ruangah Judah pawlin an hua zet. An huat ruangah hi MASADA hi a relhnak le daite’n a cawlhnak dingah a rak tuah mi a si.

Hear Of Israel
Heart Of Israel tiih kawhmi MASADA kulhpi ahcun Rome cozah kuthnuai ih pe aw ve duh lo, Sàl ih taangduh eueu lo Judah minung 967 cu riahrun an bem ta. AD 72 a rung thlengta, Rome Siangpahrang ih thusuah rorumtak cu elngam lo in Rome Ralkap hotu Flavius Silva cun ralkap thawng hleinga (15,000) lai a ko khawm ih MASADA kulhpi sungih um Judah pawl cu that cimit tum in a bei thok ta. Rome cozah cun Ram dangdang neh hnakin hi Masada kulhpi lakcu a tumbikmi a sithlang ih a hrang ahcun mit sungih hlawmbal tluk a si.

Asinan Tlang kai theinak cu lamzin pakhat lawng a um ruangah duhtawk ih kai sukso theih a si lo. Cu tiih lak theih mai a si lo ruangah Rome ralkap pawl in an kulh ṭhepṭhep ih a tlun ih umpawl hrangah suah ngaihnak a um lo. Rome ralkap pawl in len an do theinak dingah Masada tlangpi kiangin leilung an burhkhawm ih an remso vivo fawn, a tlun ih um Judah pawlin len duhtawk in an dongam fawn lo. Asan cu Rome ralkap pawl ih an sormi Sâl rual cu an hnampi Judah mi thotho an sifawn.

Judah pawl hrangah cun lamzin a pit hi a sibik. Rome ralkap pawl cun Tlangzim ih Judah pawl hung do cu thil harsatak a sizia thei in Fei le Nam ih do hnakcun ti lo le rawl lo ih kharhbet an tumta. Tidai le rawl a cem cun anmahte rung ṭum in an kut sung ah an rung pe aw thluh ding ti’n an ruat. An lak ih tam sawn cu nunau le nauhakte an si fawn ruangah rilrawn le tihal an tuar rei thei an zum lo.

Cuti’n ni khat hnu ni khat, zarh khat hnu zarh khat, thla khat hnu thla khat a liam cuahco. Asinan a tlun ih Judah ralṭha le tumruh rual cu tlang hnuai lam panin ṭumsuk ti an nei lo. Rome pawlin Masada tlangzim ih Judahpawl an kulhbet sung cu thla sarih (7) a rei thlang.

Zingkhat cu kiangkap khua hmuh theih a si veten ralveng lak ih pakhat cun a hnuai ih Rome ralkappawl cangvaih dan cu a vun thlirkual. An leilung dawlmi khal awmang tawk an ṭheh vivo ih tlangzim ih um Zialots pawl cu ( Catapult ) ( Mizo cun Sairawkherh) an timi hmunhla sainak tumpi thawn in saiban thlang ti an hmu. Judah pawl hrangah cui zing cu ṭihphannak thlentu zing dai ah a cang.

Cutin Rom ralkap pawl cun Thal thawn an hun sai ih hriamhma tuar le thi khal an um. Masada kulhpi cu Rome pawlih laktheih dinhmun ih a umthlang ruangah Pathian Yahweh in in dungtun zo a sihi tiah an ruat.

Judah pawl in duhhril ding pathum an nei.
Pakhat nak👉…Tlang hnuaiah ṭum ih an ralpawl kut ih pekawk thluh ih sâl ih can.
Pahnih nak 👉..An ralpawl hung kai tiang rak hngakih an nupi le fanu pawl duhtawk in nawmcennak ih an hman lai rak zoh cuahco.
Pathum nak 👉…An let hleinga hnak ih tam, leitlun ralkap cakbik Rome ralkap pawl rak do let ve. Asinan do letve dingcu thil cang thei a si lo. Asinan an hotu Ekaz ar Ben Yair ih thinlung ah Rome kuthnuai ih pekawk hnak cun THIH cu a duh sawn.

Sâl si cingih dam hnakcun Zalennak nei in kan thi sawn ding ticu an thupi a si.
Judah pawl hrangah cun Lei zoh ih pit, Van zoh ih sang timi rori si ko.Tikcu le canin tlangrawn ih umpawl cu a liamsan vivo. Cerlian ninu khal thlanglam thlangzim ah a liam miarmo. Khua a hung thim cetco. Tawkfangah thlang lam van tlunin thlapi khal a hung eng pempo. Zan dang bangin thlapi vang lawm in nauhakpawl cu sa celcite’n an lekaw rero. An lekaw lai cu upa zohman in kham an tum lo. Hi vekin zalen zetin dawnhar mi nei loih khawsak le tlanlen an duh ruangih hi hmunih ra um hrim an si ruangah, zovek ral hman in an zalennak le an fatepawl thinnawmnak dipdalter le hnaihnawkter an tum lo.

Akazar Ben Yair

Asinan an fatepawl ih nomnak cun rei a daih nawn lo ding ti an thei. An hotu Akazar Ben Yair ih thinlung ah Rome kuthnuai ih pekawk hnak cun thih ding cu a duh sawn ta. Tualleng nauhakpawl an ih a hmu thlang. Nauhak dang khal an lekaw an cawl thlang. Zanṭim an naih cuahco thlang. Tawkfang ah an hotu bik Ekazar Ben-Yair cun an zate’n hmun khat ah a ko khawm hai. An zaten an hotupai’ mithmai an zoh ih a thusim ding mi theih fiang tum in dai khepkhep in an to. An mithmai ah riahsiatnak a lang ko nan dungsip tumnak sete hman a lang lo. Hotubik cun a thurel an hunthok hrethro.

“Thaizing khawvan hlan ah Rome ralkappawl cu hi kulh sungah an hung lut thei thlang ding. Asinan hmailam ih kan umdan ding hril thei ding ah zalennak kan nei lai. Kan nupipawl cu mi hmuhsuam in umter lo uhsi, kan fatepawl cu sâl ih tan timi a theih hman theiter hlah uhsi.

Curuangah thil sunglawi le ropi tuah thlang uhsi. Asinan cui hlanah kan neih mi zate’n nawkkang ta thluh uhsi. Hmansehla kan rawl retnak cuam cu nawkkang loin himte’n tanta uhsi. Culawngah rilrawn ruangih thataw kan si lo, sâl ih tan kan duh lo ruangih thataw kan si ti Rome pawlin an thei ding.

“Ra uh! Kan kut in zalen zet in namsau a kaih thei lai ah thil upat tlak tuah uhsi. Ral pawl ih sâl ah lut loin thi sawn uhsi. Cuti’n hi leitlun hi kan nufapawl thawn mi zalen dinhmun in tanta uh si.”

Nupawl cun ziang theithiam hrih loin an pawm lai fahniangtepawl cu an zoh ih an mitthli a tla. Cutin an lakih pacang pahra hrilsuak in mai nupi le fanau cio that dingah thupek an si. Nam sau thawn an hngawng an sat tikah sat rem dingin le thi tengteng dingin nunau le nauhakte khalin an lu an rak tun.

Nauhak hrekkhat cu ziang bik si an hnenah thleng ding ti khal thei fiang lo in an nu le pai’ fial vekte’n zathal in an it ih an mit an sing. Nu hrekkhat cun, nam sau thawi an satthat lai rak hmu ngah pang lo dingin an fate cu ke thluangin an bokkhupter. Cuti’n mi pahra cun thin pacang zetin pakhat hnu pakhat an sat that vivo.

Cui a thattu mi pahra lakin pakhat cu camcawh fung zuk in an hril lala. Anih cu a tang lai mi pakua thattu ding a si. Cuti’n a thah hlan ah mipi an thah mi lakah hnukcat loih um lai an um pang maw ti’n an zoh ṭhasal thluh. An zate’n an thi fel thluh ti an theih hnuah an lakih an hril mi pacang pakhat cun a dang pakua cu thin pacang zetin a that thluh. Cuihnu ah amah le a mah khal a thataw ve. Cungnui’ lairel hi a vamak emem.

Rome ralkap nunrawng leh huaisen emem rual cun Masada tlang zim an luh cilh ta. Asinan an ruahvek a si lo nasa. Jealots pawl in theitawk in in rak do letve ko ding tiih an ruah laiah ziang thawmvang hman um lo in a dai reprep. Hmun khatkhat ah an thupaw si ding tiah an ruat ih, kiangkap an fangkual vivo. Sinan zohman hmuhmi an nei lo.

Hmun pakhat an va thlengcu mithi ruak lawnglawng an va hmu. Rome ralkap pawl ih thinlung khal mangbangnak in a khat.

Miruak umnak kiangih a tlar a tlarih dawlmi pindan sung an va zoh ih Judahpawl ih tanta mi rawl le eiin ding an va hmu. Cui an ret ta mi tirawl cu milai 1,000 lenglo hrangah ni tam daih a si ti an hmu. Cui’ si cun Judahpawl cu eiin ding neih lo ruangih thataw si loin, phunhnam dang sâl ih tan an duh lo ruang ih thataw an si sawn ti Rome ralkap cun an thei fiang.

Pindan an hun fangkual vivo ih a kawmte ah nupi nu pahnih le nauhak panga cu ṭih le ṭhia cingten an thup aw mi cu an va hmu. An kut in nam an hum fekfek. An theitawk ih Rome ralkap pawl dolet ve an tum ticu an mithmai zoh ihsin theih an theih. Sinan Rome Genral Flavius in ṭhaten a biak hai tikah thil umdan pawl cu an thei fiang. Cui ni cu Flavius in a dam sung ah “Mithi in minung a neh ni” a ton vei khatnak a si.

Chaim Wizemann

“ MASADA A DUAI NAWN LO DING ” timi cu Israel kumpiin an ralkap training awng mino zate hnenih a tuah ringring mi a si. Judah miphun cu an cemral vivo ih, Pathian ih khawpi Jerusalem khal humhualtu a nei nawn lo. Jerusalem cu a ṭhing riahri i Sahal le Tlangak pawl an khat ta. A va lungsiat thlak em.

Rome siangpahrang ih duhthusam vekin Judah hrin cu siatsuah ṭheh an si. Kum 2000 lai Judah miphun pawl cu thuanthu nei mumal lo in hmuntin ramtin ah an vakvai. Asinan kum zabi 18 hrawng a kim cun leitlun milian le mifim (Scientists) tamtak cu Judah miphun an si timi an hmusuak ta.

Leitlun ralpi veikhatnak ah Britist cozah cun meithal zian a tlasam ta. An ṭulsammi kuattu South America len fehsuak thei lo dingin Germany ralkap pawl in tidai sungin an khapbet fawn. Culai takah Judah mifim pakhat Chaim Wizemann timi in Vainim in zian tuahdan cu a polsuak ih, British cazoh lungawi tuk cun ziangha na duh? Na duhduh in dilaw ka lo pe ding tiah a ti. Chaim Wizemann cun sumpai, sui le ngun le inn ṭhaṭha dil lo in Judah miphun hmunkhat ih an um theinak ding ram cu a dil ih cutin Thuphuan hminthang tak “Balfour Declaration” timi a suak ta.

Arthur James Balfior

BALFOUR THUPHUAN an timi cu British Prime minister Arthur James Balfior in Judah milian maktara De Rotschilds hnen ih ca a kuatmi cu a si. Himi cakuat sungah Judah pawl ih ram an neih thei dan dingcu a kuat sanbik mi a si. Cui’ cakuat cu cakuat naran si loin thuphuan tikhal ih kawh theih a si.

Judah pawl hrangah Palestine ram ih ram nget an neih ding a duhsakthu cu a ngan tel ih cumi cu World Zealots Congress hruaitu pawl cun hma an la hngal ih Rome siangpahrang ih duhthusam cu an siatbal theisal ta.

Kum 1930 a kim tikah Judah miphun cu million 13 lai an pung man. Bible khal ah Judah pawl cu nau neih an olsam zia kan hmuh kha. Sinan 1933 ah German mi Hitler in thuneihnak a ngah veten Judah miphun cu nuai cimit tum in a bei ih million 7 lai a that. Asinan an cemral thei cuang lo.

Tu ahcun leilung pumpi ah Judah miphun hi million 19 hrawng lawng an um. Sinan leitlun milian 100 an hrilsuahmi lakah 40 cu Judah hrinhnam deuh hlir an si. Cun Scientists hmin thang hleice 100 an hrilsuak ih 60 cu Judah mi thotho an si. Nobel Prize hi leitlun ah remnak le himnak a um theinak dingih zuamtu, mifim hleice pawl, milai hrangih thil sunglawi le ropi a tuahsuaktu pawl hnen ih pekmi a si.

Nobel Prize ngahzotu hi minung 980 an si ih, cumi lakah 195 cu Judah miphun thotho an si. Japan mi 25 hrawng in an ngah i, Judah miphun hua emem tu Muslim minung Million 1800 um sungah minung 6 hrawng in an ngah ve. Leilung tlunih minung tambik pahnih nak India hi minung million 1300 hrawng um, cumi lakah mi 9 hrawng in an la ve. Kawlram miteh paziat in ha ngah zo?

Pathian ih hrilmi miphum cu nuai cimit tum in bei rero khal sehla a tawpnak ahcun nehnak thantar cu an tarsuak thotho a si. 1947 a thleng, Isarael cun zalennak ( Independent) cu khawlvel theih ah a phuang durdo ta.

Ca Laknak pawl.
Dr. Hre Mang ( Facebook)
Pu No Than Kap (Facebook )
Thu Ngaihnawm Huang ( H.Lalfakzuala )
ISRAEL Leh AMFU ( Dr.Chawngkhuma Chawngthu)
Tka Zote Thankhuma ( Facebook )