Bawi Jesuh A Sam A Sau Maw?

Bawi Jesuh A Sam A Sau Maw?
Sianglianuk Kianghrol 
                Tulai san ah Bawi Jesuh ih zuk le zuknung kan hmuh thei mi tam sawn cu sam sau, khabe hmul nei, mi ngo zet, korfual mawihnai zet hruh a si tlangpi.
Himi pawl hi zuk suaitu le zuknung tuahtu pawl ih suangtuahnak ih an sersuah mi an si ih, amah Bawi Jesuh ih hmel ngaingai an si rori ti theih an si lo.
Bible sungah Bawi Jesuh ih sam a sau le a tawi thuhla hmuh ding a um lo. Asinan Bible hmun dangdang ih thuhla zoh phah in a sam a sau maw a tawi ding timi kan zoh hnik pei.
Bawi Jesuh a thi ih a thawh sal hnu kum 25 hrawng (AD 57) ah Paul cun Korin mi pawl hnenah hitin a rak sim: “Leilungtlun thil um dan ahhin mipa in sam saupi zuah cu ningzakza a si, ti a lang” (1 Korin 11:14).
Bawi Jesuh kha Judah dan thlun ih nung a si. Tui’ ni tiang ah Orthodox Jew (Moses thupek thlun fekfektu Israel ) pawl cun Puithiam Hnatuan sungih thupek hi an thlun lai. Cumi ahcun baksam le khahmul thuhla hitin a um: “Mithi ngai ruangah nan bak sam nan tan thluh lo pei, nan khahmul khal nan met thluh lo pei,” (Puithiam. 29:27). Bawi Jesuh hi Moses dan thlun ttha zettu a si (Matthai 5:17).
Israel pawl ih puithiam tla hi an sam a rak sau ziarziar lo ti Profet Ezekiel in rak sim. “Puithiam pawl cu an lu an met lo pei, an sam khal saupi in an zuah lo pei. A mawi tawk in an sam cu an zuah pei” (Ezk. 44:20). Hebru 4:14 ah Bawi Jesuh cu kan hrangih Puithiam sang ropi a si ti kan hmuh ruangah, Jesuh ih sam khal hi a sau ziarziar tuk lo ding ti theinak lai a um.
Hebru miphun hin Nazir thukamnak hnuai ih an um sung cu sam, hmurhmul le khahmul met lo in an zuah. Nazir thukamnak an ttheh tikah an sam an met sal (Mipum. 6:5; 6:18). Asinan dam sungih Nizir mi si ding ah tiamkam mi pawl cun an sam an zuah. Samson le Samuel kha Nazir mi an si ih, mithiam pawl in Baptisttu John le Paul khal Nazir mi an si ding tiah an zum.
Israel miphun lakih hmelttha bik Absalom khan kum tinte’n a sam a met ti a si ih, a sam kha sau tuk lo, tawi tuk lo hrawng a si a zum um (2 Samuel 14:25-26).
Curuangah Bawi Jesuh hi sam tawi deuh, bianghmul le khahmul nei a si ding tiah mithiam pawl in an zum.
Asile, ziangah Bawi Jesuh ih zuk ah a sam a sau in an suai? Zuk suaitu tthenkhat in Bawi Jesuh kha Nazir mi a si ti’n an rak theih sual pang tla a si thei.
Khatlam ah Bawi Jesuh san ih leitlun nunphung lar bik le, tuisan tiang ih in ciahnehtu cu Greek le Roman nunphung an si. Cui’ Greek le Roman pawl ih biak mi khuavang pathian pawl kha, anmah Greek le Roman pawl vekin, an sam a sau ve tiah an rak zum.
Greek pawl ih Zeus kha Roman pawl ih Jupiter ah a rung cang ih, Greek khuavang pathian dang khal Roman hmin an run nei thluh. Cui’ an pathian pawl ih zuk an suai tikah siseh, anmah Greek le Roman pawl siseh, an sam a sau hai.
Cumi zulzui in Bawi Jesuh khal hi a sam a sau ko ding ti’n an ruat, asilole, ziangkim tlun ih thuneitu Pathian a sinak kha langsartertu ding ah, zuk an suai tikah a sam an sauter tla a si thei.
Tthimnak ah Bawi Jesuh zuk tthenkhat ah a lu kiangkap ah a bial ih eng pempi an tuah ttheu mi tla khi, Greek le Roman pawl ih Ni pathian Apollo zuk ihsin an cawn mi a si.
Nunphung le biaknak sakhua dang ih ciahnehnak tel lo te’n kan vun ruat khal asile, Bawi Jesuh kha a sam a sau tuk lo ding tinak a si.

13 Comments


  1. အရေးတော်ပုံသေချာျပါက်အောင်မည်


  2. အရှုံးမပေးမချင်းငါတို့နိုင်တယ်


    1. အောင်ကိုအောင်ရမည်


  3. Click ဖြစ်အောင် Click ကြပါ အမျိုးတို့🙏🙏🙏


  4. 💪💪💪💪💪🥰🥰🥰🥰


  5. We Love & We Trust A Nyein & We support ever…
    We Must Win Spring Revolution in myanmar ( Burma)


  6. အာရုံခံစနစ်နဲ့ ကမ္ဘာကိုခြေဆန့်မယ်


  7. I Love Chinland

    Koko Romeo

Comments are closed.