Ziah “𝐆𝐨𝐨𝐝 𝐅𝐫𝐢𝐝𝐚𝐲”? “𝐁𝐚𝐝 𝐅𝐫𝐢𝐝𝐚𝐲” 𝐊𝐚𝐧 𝐓𝐢 𝐋𝐨?

Tuzing a ceu phutphat ah khan an hrennak hri an phoih. Nizaan i an tuknak le an thonghnak ah a hmur le a mit tlang kam hrawng, thi chuakmi an car pah cang. An tuknak le an ṭhuatnak ah a hmai dukmi le a mit tlang kam le a hmur hrawng phingmi tu cu a zual ngai. “Van Bawi Fa ve lo bang,” voikhat “duak” tiah von zoh pin khi cu mit nih a zoh ngam ti lo.

Hnulei in von nam pah lengmang bu khin Jesuh cu tlangbawi zik “Kaiafas” sinah an chuahpi. Tlangbawi upa le phung cawnpiaktu upa vialte an ipum dih (Mat 26:57; Mark 14:53).

“Na thihnak ah ka thi ve lai” tiah ralṭha in a rak chimtu Lungtum (Peter) nih a thli in a hei zulh—tlangbawi tual par tiang khi.

Sual an puh, a sual an kawl. Lih an chim len nain a sual an hmu kho lo. Lih an chimmi zong kha anmah le anmah an ikalh (Mark 14:56-57). Cu bu cun an thah khawhnak ding lam an kawl. Mangki bawi Pilate le Herod sin hna an phanhpi.

Pontius Pilate nih a sualnak zeihmanh a hmuh lo caah thlah a duh i a phunphun in lam a kawl. A tukter hna (John 19:4-5).

Judah phungah mi pakhat nih sualnak a tuah tikah a tam bik voi 40 lawng tuknak nawl a um. Cu hmanh ah “a tuk kan palh sual lai i voi 41 kan tuk sual hna lai” ti an phaang caah voi 39 lawng tuk asi tawn (2 Kor 11:24).

Asinain, Jesuh an tukning cu an luan, phung an buar. Tuk ding zat asi nak leng pin an tuk.

{𝘈𝘯 𝘵𝘶𝘬𝘯𝘢𝘬 𝘩𝘳𝘪 𝘤𝘶 𝘴𝘢𝘱𝘩𝘢𝘸 𝘩𝘳𝘪𝘣𝘰𝘳 𝘢𝘴𝘪. 𝘊𝘶 𝘴𝘢𝘱𝘩𝘢𝘸 𝘩𝘳𝘪𝘣𝘰𝘳 𝘬𝘩𝘢𝘵 𝘢𝘩 𝘤𝘶𝘯 𝘩𝘳𝘪 𝘩𝘮𝘦𝘵𝘦𝘵𝘦 30 𝘪𝘯 40 𝘬𝘢𝘳 𝘢 𝘶𝘮. 𝘊𝘶 𝘩𝘳𝘪 𝘩𝘮𝘦𝘵𝘦𝘵𝘦 𝘢𝘩𝘤𝘶𝘯 𝘴𝘢𝘳𝘶𝘩 𝘩𝘢𝘢𝘳𝘮𝘪 𝘵𝘦𝘵𝘦 𝘢𝘯 𝘵̣𝘦𝘮𝘩 𝘤𝘩𝘪𝘩. 𝘝𝘰𝘪𝘬𝘩𝘢𝘵 𝘢𝘯 𝘵𝘶𝘬 𝘩𝘯𝘢 𝘢𝘩 𝘬𝘩𝘪𝘯 𝘢 𝘷𝘶𝘯 𝘵𝘭𝘦𝘬 𝘭𝘢𝘸𝘯𝘨 𝘴𝘪𝘭𝘰𝘪𝘯 𝘢 𝘵𝘪𝘵𝘴𝘢 𝘵𝘪𝘢𝘯𝘨 𝘢𝘢 𝘭𝘢 𝘥𝘪𝘩 𝘱𝘪𝘯𝘢𝘩 𝘢𝘯 𝘵𝘩𝘢𝘩𝘳𝘪 𝘢 𝘤𝘩𝘢𝘩 𝘥𝘪𝘩, ti si}.

Cu hnu ahcun an irelh rih lo caah hling in tahmi luchin an chinh, puan sendup in an fam/thuam pinah “vailam ah that ko” tiah an au.

Cu hnu zongah Pontius Pilate nih Jesuh luat seh, ti a duh peng rih. Cucaah, Barabbas phunṭanh (Rom cozah dotu ramkhel pa) an tlaih mi le Jesuh ah ahodah ka chuah hna lai? tiah a hal hna.

“𝗕𝗮𝗿𝗮𝗯𝗯𝗮𝘀 𝗰𝗵𝘂𝗮𝗵 𝗹𝗮𝘄 𝗝𝗲𝘀𝘂𝗵 𝗰𝘂 𝘁𝗵𝗮𝘁 𝗸𝗼” tiah an authawng nih khuari bang van hramdeng tiang a tlirh. Pontius Pilate a lung dong asinain hnachuah ruangah Jesuh thah an duhmi asi, ti a hngalh caah a kut aa ṭawl (Mat 27:15-26).

Pilate cu nihin tiang a kut aa ṭawl peng e, ti si.Luruh tlanglei an panhpi. A hmul meh awk ah an hruaimi tuu bang, awn-au lo tein a um (Isai 53:7).

An tuknak ruangah a chuakmi thihring a pit kho ti lo; a fahtuk ah khin a pumpuluk in “a thirh.” Cu bu cun, an khenhchihnak Sidar thingṭol, fek chinchin seh, tiah tii ah an ciahmi kha Rom ralkap pahnih 2 nih “hawr lengmang khin” an von izawn. Jesuh liang cungah an von khinh. A rit tuk ah a khup tha a thirh dih. Asinain, cu tluk i a ritmi vailam tung nakin vawlei sualnak a phurhmi a let in a rit deuh (John 1:29; 1 John 3:5).

Lampi ah voi 7 a tlu. “Vailam tung a pu kho ti lo” tiah an ruah. Cucaah, Cyrene khua mi Simon an bawmhter. Simon cu Alekzandar le Rufas pa a si(Mark 15:21). Asinain, Jesuh caah vailam tung nakin vawlei sualnak vialte kha a rit deuhmi a rak si.

“𝐆𝐨𝐥𝐠𝐨𝐭𝐡𝐚” timi Luruh tlang an phaan. Cu tlang cu ṭihnung tuk ah zaan von chim lo chunlai koko hmanh ah minung cu chim lo, uifir hmanh a kal ngam lo (Pu Hrang Nawl chimning). Rili misual le Rom cozah le biaknak dotu pawl vialte thahnak hmun asi. Sarthih le thihchia in thahnak hmun asi. Mi a rap tuk lawlaw khi si. Judah pawl nih “𝐆𝐨𝐥𝐠𝐨𝐭𝐡𝐚” min an theih ahcun a rap tuk hna nakah khin an hmulthi ling i an busik saisem tiang a chuak.

Vanbawi Fa ve lo bang, misual pahnih karlak ah an thlai. Vailam phun 3 lakah misual bikmi thahnak ah hmanmi ” ah an thlai (Mat 27:38).

“Anmah khamh awk ah a ra nain annih nih an rak nihsawh — Judah siangpahrang cu na si kun lo maw, i khamh ngat” tiah an ti (Luka 23:37).

“Nika hmanh nih a zoh ngam lo, vawlei pi cu suimilam 3 tluk hrawng a muidup. Cun, misual ruangah vailam cung a thihnak cu Pa Pathian zong nih a zoh ngam lo” (Mat 27:46).

Vailam cungah bia roling phun 7 a chim hnu ah thi (𝑳𝒖𝒌𝒆 23:34; 𝑳𝒖𝒌𝒆 23:43; 𝑱𝒐𝒉𝒏 19:26, 27; 𝑴𝒂𝒕𝒕𝒉𝒆𝒘 27:46; 𝑴𝒂𝒓𝒌 15:34; 𝑱𝒐𝒉𝒏 19:28; 𝑱𝒐𝒉𝒏 19:30; 𝑳𝒖𝒌𝒆 23:46).

A thih tak le thih tak lo, Feichunh thiam (spear expert) Rom ralkap nih a hnak ah a fei cun a hon sawh (John 19:34). A thi cang, ti an fiang hnu ah vailam cung cun an ṭhumh i mithlan ah an vui (Mat 27:57).

𝗖𝘂 𝘁𝗹𝘂𝗸 𝘁̣𝗶𝗵𝗻𝘂𝗻𝗴 𝗺𝗶 𝗙𝗿𝗶𝗱𝗮𝘆 𝗰𝘂 “𝗚𝗼𝗼𝗱 𝗙𝗿𝗶𝗱𝗮𝘆” tiah 𝗮𝘂𝗵 𝗮𝘀𝗶 𝗵𝗻𝗴𝗮?

A chiami, a muimi le ṭihnungmi “A Bad Friday” (Cawn Ninga Nii) tiah auh awk asi nain lingtalet in auh asinak a ruang cu “Jesuh kan tlangbawi ngan asinak le amah thisen thengte put in voikhat ah za lakin kan sual rai a thawinak ruangah asi” (Heb 9:12; 13:12). Jesuh Khrih thihnak ruangah cun zungzal miluat kan si i kan sualnak kha ngaihthiam kan si (Efesa 1:7).

Cu lawng cun “tuanbia” a dih lo. Jesuh Khrih cu a chim bantukin thihnak nih a tei lo; a tho ṭhan. Jesuh Khrih he kan thi i a thawhṭhannak ah nun thar in kan tho ve. Khrih ah ser thar kan si (II Cor 5:17).

Vawlei caah cun a muimi “Bad Friday” asi kho nain khamh lio cuahmah mi kannih caah cun “Good Friday” asi ko. Pathian ṭhawnnak hmual a langhnak asi (I Cor 1:23-24).

Happy Good Friday

Credit-Henry Nawlthangbik Hlawnceu