‘Pathian hnen ka sim ding’ hla a ra suahdan

'Pathian hnen ka sim ding' hla a ra suahdan

Ngantu: Van Kio

Van ah Pathian thawn kan ton tikah Leilung ih thil umdan Bawi pai’ hnen ka sim… timi hla te kan thei cio ding ka zum. Tu lai kan ram mipi pawl raltlan ih kan um rero boruak thawn a deng aw zetmi hla te si ih tu ahcun a tak rori in a hlathu ka tuar thei thlang.

Himi hla a rak suah lai ahcun kan ram tla Paletwa le Rakhine ti lo bak cu a rak buai hrih lo.

Hla a ra suahdan thu hi hla phuahtu John Lsl hnen in rin lo pi in ka rak thei. 2017 kum thok ah Falam kum 125 kim puai hrang hla an tuahmi thu interview tuah ding in Insein ih Cung Aung ih inn ah ka va feh. Zin ah John LSL ka vun sawm phah. Kan pahnih in Cung Aung Studio ah kan va feh ih video zuk ding ih kan timlam rero lai ah U John in computer sung ih FPTP ih tuahmi Chin Hill Resettlement Concert ah Israel VSL ih sakmi a hla te in ngai ter. Hla a play hlan ah hla thu a dondan kaa thaw zet in hi tin in sim.

Ni khat cu nauhak tlawng cazirhnak ihsin ka tlung. Inn ka thlen ah thuthang pakhat te ka vun siar ngah. Syria ram ralbuainak ah nauhak pate cu hriamhma thawn sizung ih a um. Media pawl in nauhak pate thu an suh tikah a nih in “Van ka thlen ih Pathian ka ton tikah Leilung tlun ih thil cangmi hmuahhmuah ka sim ding” ti’n a tongmi te an ngan. Cumi cun ka thin in khawi tuk ih cui’ thu te ihsin himi hla a ra suakmi a si.

Cumi in sim theh in hla ka vun ngai cu a hla hi a nung cuang in ka thei. Ka khawsikhmul an hung puak surso.

A simmi Syria nauhak pate zuk tla thuthang ah ka rak hmu ve tikah thinlung ah mi a tham cuang. Tohkham parah nauhak kum 4 mi te Omran Daqneesh cu sam hnok nawn te’n a lu in a biang ah thisen a rung luang. A zuk hi ramsung ralbuainak ih hamkhat zia langtertu ah a rung cang.

Cule hla phuahtu U John thuhla lam vun rel bet sehla anih cu CBC GS tla rak tuan dah Rev. Tial Dum ih fapa a si. Amah hi Philippine ah Music thawn degree a lak ih tu ahcun Yagon ah a um ih Cung Music Academy ah tla music lam a zirh rero.

Hla fing tam zet a rak phuah zo ih Falam kum 125 kim puai ih theme song “Maw Falam” timi hla tla a mai kutsuak a si.