Sanphung sungih Pulh-nat Siavabik : Thihnak Dum

Sanphung sungih Pulh-nat Siavabik : Thihnak Dum

Siang Lian Uk Kianghrol

1346 kum kiangkap ih Bubonic plague pulh-nat a ra suahnak cu san le vang pakhat lawng ah a tthum aw lo. Asinan Europe khawmualpi ih minung pawl in miluket (witches) an um an rak zumnak hi puhmawh mi tlangpi pakhat a si. Miluket pawl hi minung ih tuar theih rual lo siatralnak le natnak thlentu a si ti ih an ruat ruangah rehter dan ding nasa zet in an rak hawl. Cumi ah, zawhte pawl hi miluket phuanlangawknak an si ti’n an ruat ruangah inn ih vulh mi zawhte siseh, zawhte dangdang siseh, a thawng za sawmsiar in an rak that ciamco. Zawhte an um nawn lo cun miluket pawl in an dawithiamnak an hmang thei lo tiah an rak zum.

Cutin nasa zet ih miluket an donak ruangah zawhte tampi cu meisa sungah an ziamral vivo. Cu vete’n Europe khawvel cu zinghnam khawvel ah a hung cang. 1346 kum ah China ram ih Silk Road (hlanlai ih Asia le Europe sumdawnnak lamzin thupibik) ihsin zinghnam pawl cu Crimea ah a ra pungkhawm aw ciamco. Sumdawng pawl ih long pawl ah zinghnam an pungzai ciamco. A thattu ding zawhte a um fawn lo. Cui zinghnam pawl cu hrik phunphun nei an si bet fawn. Cui’ zinghnam hrik pawl ih nat cu minung hnen ih a thlen tikah plague nat tiah kan ko.

Tui ni ahcun leitlun ih hmun tamsawn ah plague nat suahtertu hrik cu dawihloh an si zo. Ziangahtile thianhlimnak timi hi Pathian duhdan ih nun timi sangtu ah kan ret cio ruangah a si. Tuini ahcun cumi nathrik ngah pang khal awla tuamhlawmawk a har lo. Streptomycin sii in natrik pungzai lo ding in a tuah ruangah taksa ih nat do theinak thazang a cak vivo ih nathrik kha a thi mei ttheu. San Laita ah kha cun plague nat na ngah cun tuamhlawm dam ding hi a ol lo zet.

Tuamhlawm lo ahcun plague nathrik hi nat ngahtupawl za ah za thihnak a thlentertu nat umsun ci thum lak ih pakhat a si. Hivek nathrik dang pahnih cu rabies encephalitis (thluak thling nathrik) le HIV an si. San Laita ih siivai thiamnak dinhmun kan zoh tikah plague nat ihsi luatsuah theinak kalhmang a rak um lo. Cumi san lai ih siivailam mithiam turubik pawl hman in ziangvek ih kilhimawk ding ti an thei lo.

Sibawipawl in nasa zet in an zuam rero nan an rak hlawhtling lo. An rak tuamhlawmawk dan hmuahhmuah lakih ttangkaibik pakhat cu kuak fawp hi a si hmang. Cumi hman cu kuak an fawp tikah nathrik phurtu hrik pawl an tlan ruangah men a si. Asinan an tuamhlawmawk dan ah Pathian thinhengtertu kalhmang maksak pakhat a rak tel.

Mah le mah vuakawknak ropi cu 1349 ihsin a darh thok. A hleice in Germany ahcun Roman pawl ih hman ttheu mi vuakfung hling nei thawn anmah le anmah thisen suak thluahthlo tiang in an vaw aw ciamco ttheu. An hman mi vuakfung cu Jesuh Khrih vuaknak ih an rak hman mi vek kha a si. Ziangah cumi an tuah tile, natnak nasa zet an tuar ahcun Pathian in a zangfah hai ding ih plague nat a rehter ding ti ih an zum ruangah a si. Asinan zianghman a tthahnem cuang lo.

Plague nat cu Pathian thinhengnak tarlangtu a si tiah an ruat. Cumi in a hngongsuah mi cu, Pathian thinhengnak hi Europe khawmualpi ih Khrihfa a si lo mi pawl ruangah a si ding timi ruahnak a umter mi a si. A hleice in Judah sakhua a betu Jew miphun pawl mawhthluk an tuar cuang. 1349 February thla sungah French-German ramri ih Strasbourg ah Jew miphun 2,000 cu an taksa ruangpum can nawi sak in tthuamban parah an ur. Asinan plague nat cu a darh vivo thotho.

Cumi ttum ih plague pulh-nat in Egypt ram mipum zatek 40%, Nisuah Laili hmunram mipum zatek 30%, Paris khawlipi mipum 100,000 ih a hrek hrawng, a that. A tuar besebik hmunram cu Italy, Spain, le thlanglam French pawl tel in Mediterranean tipithuanthum kap ih um Europe ram pawl an si. Cumi ram pawl ahcun rampi mipum ih zatek 75% ihsin 80% tiang an thi. Pope Clement VI cu a bawi tohkham kha nazi 24 sung rori in zial ri ah meisa a kimvel ih vang thluh in a humhim aw ih a luat. Cumi hman cu meisa an van sak mi lenglam naite ah nathrik phurtu hrikpawl an hmu.

England ram mipum zatek 20% hrawng an thi ve. Himi ttum ih mithi hi leitlun mipum ih zatek 25% (tthen li ih tthen khat) hrawng a si. Sahara nelrawn kiang ih Africa ram pawl, India le Nisuahlam ram pawl tiang a thleng. Asia le Europe khawmualpi ih zatek 66% ah a darh. Kum li sung ah minung 100,000,000 hrawng an thi.

Thihnak Dum hi Flamehorse website in sanphung sungih cam siavabik (ten worst moments in human history) a hril mi ah a sebik palinak a si.