Duhdawt nak timi cu

Duhdawt nak timi cu

Ni khat ah Plato in a sayapa Socrates hnenah, “Duhdawtnak timi hi ziang a si?” tiah a sut.Socrates in Plato cu dunglam kir sal awi lo in, sangvut cinnak loram pakhat sungah a fehter ih, a fehnak ih sangvut vui tthabik, a tumbik pakhat khiak ding in a fial.

A sayapai’ fial mi a oltuk ah a ruat ih Plato cu mah le mah rinsanawknak nei zet in sangvut lo sungah a lut.
Ni hrek a kim tiang in sangvut lak ahcun a um nan, a netnak ahcun beidong in a kut lawng in a ra kir.

Socrates hnen a thleng ih, “A tthabik ti ih ka ruah mi sangvut vui cu ka hmu ko. Asinan pakhat lawng lak ding a si tikah a tthabik a si taktak pei maw timi ka ruat ih, cumi hnak ih ttha deuh an um ko ding ti’n ka feh vivo, loram cem tiang ka thlen lawng ah ka kut ah zianghman a um hrih lo timi ka theisuak,” a ti tikah Socrates in, “Khami kha duhdawtnak a si,” tiah a sim.

Ni khat ah Plato in Socrates cu, “Tthitumnak timi hi ziang a si?” tiah a sut lala ti a si. Cutikah Socrates in Plato kha far kung hlir umnak hmun ah dung kir awi lo in vei khat a fehsuakter ih, a fehnak zawn ih um mi farkung lak ah Christmas hrangih hman ding farkung tthabik pakhat lak a fial.

Zirhnak pakhat rak ngah zo Plato cun tui ttum ahcun thil dik lo ka tuah nawn lo ding ti’n rinsanawknak nei zet in farkung lak ahcun a feh. Ni hrek a rei tikah a hnah nim ttha mumal lo, a kung khal a dingh ttha pam ti theih fangfang farkung pakhat pu in bang le cau zet in a ra kir.

“Himi hi maw farkung tthabik cu?” ti ih Socrates in a sut tikah, “Pakhat lawng lak ding a si ruangah a tthabik khuimi a si ti’n ka hawl rero tikah a awmang ve ko tiih ka ruah mi farkung ka hmu. Cumi ka hmuh can ah ka caan le thazang an cemral vivo thlang ti khal ka thei. Curuangah a tthabik a si le si lo khal ngaihsak nawn lo in ka hau ih, ka rat lung a si ko,” tiah Plato in a sim tikah Socrates in, “Khami kha tthitumnak a si,” tiah a sim.

Ni khat cu Plato in Socrates hnenah, “Thupte nupi timi ziang a si?” tiah a sut lala.Tui ttum khal ah Socrates in Plato cu hramlak ah a vahter. Tui ttum ahcun dung kir khal a theih. Duhdandan ih veivah kual khal a theih. A tuah ding mi cu a thlennak hmun ih “Pangpar mawibik pakhat” ttawh ding a si.


Tui ttum khal Plato cu rinsan aw zet in hramlak ahcun a feh. Nazi pahnih zik a rei hnu ah thin nuam lo mithmai thawn rong tinkim a nei mi pangpar vuai deuh pakhat keng in a ra kir.

“Himi hi pangpar mawibik maw?” tiah Socrates in a sut. Plato cun, “Nazi pahnih sung zikte ka hawl tikah a mawibik ti ih ka ruah mi himi pangpar hi ka run ttawt. Asinan lamzin ah nuamtete’n a vuai vivo a si hi,” tiah a sawn.Socrates in, “Khami kha thupte nupi a si kha,” tiah a sim.

Ni khat cu Plato in Socrates kha, “Hringnun timi ziang a si?” tiah a sut lala.Socrates in Plato cu hramlak ah a fehter lala. Tui ttum khal duhdandan ih feh a theih ih, a thlennak hmun ih pangpar mawibik pakhat ttawh ding thotho a si.

Plato cun ti sual nawn lo ding in ralringte’n a feh. Ni thum, zan thum a rei tiang in Plato a ra tlun sal lo tikah Socrates in a va hawl. Hramlak hmun pakhat ah Plato cu bukte khawh in a rak um kha a va hmu.

“Pangpar mawibik cu na hmu zo maw?” ti ih a sut tikah Plato in pangpar pakhat khih phah in, “Himi hi a mawibik ti a theih pei maw?” tiah a sut.

“Asile ziangah na run ttawt tlung lo?”

“Ka ttawh ahcun a vuai ding. Ka ttawh lo khal ah a vuai leh ding ti cu ka thei ko. Curuangah mawi zet ih a par lai hi ka zoh ding ih, amahtei’ a vuai hnu ah pangpar dang ka hawl leh ding. Himi hi ka hmuh dah mi pangpar lak ih a mawibik a pahnihnak a si.”

“Aw. Hringnun ih sullam na theithiam zo,” tiah Socrates in Plato cu a sim.

1 Comment

Comments are closed.